爆炸猛男心聲

呢個專欄我地打算發表一下我地「爆」、「炸」、「猛」、「男」四個人既意見同心聲，例如我地忽然諗到Ｄ爆炸騎呢古怪念頭，都希望擺係呢個專欄。又或者係度回應大家既email 同埋留言，分享同交流，希望同大家更加有互動關係。

爆炸猛男感性對話

曾己何時我地接受某周刊訪問時，我地毫不保留咁剖白我地心中既意見，以下內容從未曝光！

 

 

 

 

1. 家庭和成長背景，如家庭環境，大中小學的升學過程以及工作過程？

答：
我地四個人既共通點，除左貧窮之外，都係來自極度傳統既家庭，例如用膳時，不可用筷子跨過面前既送菜，去夾對面既送菜，否則長輩會用筷子打手。係公眾場所唔可以嘈之巴閉。我地完全係好多規限條例下長大，冇機會將心中既想法表達出來。我地只能自己係度諗埋ｄ古怪靈怪既概念，有時係街度望野望到眼定定同埋傻笑，隔離位人兄以為我地癡左線。

我地好細個，係學業上已經嚐到人生既起跌，都試過考第尾，亦試過考第一。世事無絕對，只要有興趣。眼見見邊既舊同學已經成為專業人士，醫生啦、律師啦、會計師等等。但創意工業係香港，始終唔會俾人認為係一個專業既行業，但我地冇後悔，一來自己根本考唔到，二來冇興趣。

出到社會從事創意工作，例如平面設計、廣告設計及多媒體設計，客戶始終有絕對既話事權，一日未到交貨日，都冇話完美既設計，只有不斷既修改，直至交貨大限已到為止。呢種工作，真係冇癮。

2. 點解會由全職工作返轉頭做全職學生？點解揀呢個課程？別說因為心入面團火未熄啊！要具體一點，如舉例講下過去的工作如何沉悶難頂或者要受氣。

答：
畢業之後，出黎社會工作，不可避免遇到很多挫折，例如：超時工作冇補水、客戶無理要求、創作上既諸多制肘、工作壓力大引致皮質醇升高、社會上既唔和諧、世界唔和平等等，我地都心想，從厭悶既工作中抽離一下，應該要重返校園來淨化一下我地既心靈。

其實我地心中既一團火，係因為我地係社會上遇到好多 Ph.D。實際上Ph.D係哲學博士(Doctor of Philosophy)既簡稱。係好多人心目中，佢地個個都係專家，而且當佢地講既野就係權威同真理。而我地明白呢個道理，要出人頭地，兼唔受氣，就要做權威；要做權威，就要做Ph.D!!!!!!!!

所以我地就創作左個口號 ”We Redefine Reality”，即係“我地重新定義真理”，係我地final project既中心思想。自己塑造一個權威既形象，我地借Ph.D 既意義，重新定位”PHD”(Paranormal Historical Detectives 驚世調查團) 而每個團員，就叫做驚世調查員。自從呢個project出世以來，每一個團友都以此為豪。

3. 參賽的決定究竟係點落呢？中間有乜事發生過？有冇爭拗抉擇？家人朋友點睇？要有正有反。

答：
其實《殘酷一叮》真係一個好有趣既節目，佢同其他節目唔同既地方，唔係電視台話就做乜就做乜，《一叮》有一種互動性，觀眾隨時可以變成參賽者，而且可以成為節目裏面既一部份。我地係度諗，我地都係讀多媒體，創作人同觀眾之間既互動性好重要。有一個咁好既渠道，我地都應該支持同參與，現實ｄ講，我地都有一種虛榮心同埋想拿取豐富既獎金同獎品，又可以幫補我地既畢業功課。

仲有一樣野，香港剛剛經濟復甦，好多人都經歷過一段唔開心既日子，令個社會開心Ｄ，咁做娛樂性豐富既表演，娛人娛己，又何樂而不為呢？

4. 一個大男人要咁樣剃頭拋頭露面搞笑一定會有掙扎和抗拒的，點解可以克服呢？又點樣可以克服呢？動力何來？目標何在？

答：
我地開頭創作既時候，係諗到用爆炸頭做我地既形象，而我地都諗到觀眾會估到我地會除低假髮，咁為左加強除左假髮後既震撼效果，我地就諗到剃光頭。咁既然一心要參加，就要豁出去，放開一切心理包袱，犧牲一下囉。為左呢樣野我地隊員間都有掙拗，究竟剪到幾短呢？眼見自己手上既電剷，只有幾個選擇， 3mm、6mm、9mm同12mm，剃到光晒又真係於心不忍。12mm有隊員覺得太長，唔似光頭，但3mm又真係太短，冇晒毛髮保護（好凍！）咁 6mm 同 9mm之間我地傾左好幾個鐘頭，我地最近都有留意到，一向造型靚仔既偶像級天王巨星郭富城係自己既演唱會都剃光個頭，拿取個平衡，唔好太短之中又短少少，結果都係揀6mm啦。

動力係有一次，我地四個經過旺角某唱片鋪，當時播埋ｄ老土舊歌，本來不以自然，但聽到一首好勵志、好感性、節奏強烈，簡直振奮人心，呢首就係我地既參賽歌《乘風破浪》，老土得黎又好好笑，正切合我們既創作主題，而且我地四個大男人唱女人歌，相信都可以令觀眾耳目一新。

我地既目標都係想拿取多ｄ獎金，最少希望有萬二蚊，理想更係多ｄ啦。咁所以我地既大字報都寫出黎 — 「120秒」。

5. 你們的造型和表演計劃一定有參考過別人的，講多點靈感何來。

答：
我地既造型其實係自己天馬行空創作出黎，但自己定下幾個規格，就係要又既嚴肅又騎呢，呢種強烈對比會造成好滑稽既效果。有ｄ似外國非常流行既 ”camp humour”。結果我地既造型係上半身著晒白恤衫打晒呔，好似好嚴肅，但下半身就著短褲同白波襪，仲要著返對黑皮鞋。

至於表演既動作，主要係圖書館參考一ｄ舞蹈既影帶，例如芭蕾舞既動作。我地係《一叮》表演有一幕係四個人手握手、圍住一齊團團轉然後散開，正是芭蕾舞既動作，可惜最後觀眾無緣睇到。

補充資料－「三十九歲？」

好多人都問我地係咪個個都 39歲，其實呢個都係一個賣點。因為男人「三十以立、四十不惑」，我地希望打破傳統觀念，三十幾歲人理應成家立業，應該要沉實穩重ｄ。但我地想帶出創作應該唔受年齡及性別既束搏，邊個話年紀大既人唔可以有童真同埋活潑既一面。
所以我地選擇左 39歲，就係我地既年紀。差一年就四十歲，係又關鍵又尷尬既一年，觀眾睇到一定有興趣想知更多。